Islandaj pravoĉoj
1
Estis en la tempo de la reĝo Harald kun la Belaj
Haroj, filo de Halfdan la Nigra, filo de Gudrod la
Ĉasanta Reĝo, filo de Eystein la Korpoventa,
filo de Olaf la Lignogravuristo, ke viro nomita Hallfred
kondukis sian ŝipon al Islando, ĝis Breiddal.
Tio estas malsupre de la distrikto Fljotsdalsherad.
Surŝipe kun li estis liaj edzino kaj filo, nomita
Hrafnkel. Li havis tiam dekkvin jarojn kaj estis brava
kaj belaspekta junulo.
2
Hrafnkel havis la kutimon rajdi sur la montojn somere.
Je tiu tempo la valo Jokuldal estis plene priloĝata
supre de la pontoj. Hrafnkel rajdis supren sur la altebenaĵon
Fljotsdalsheid kaj vidis, kie neloĝata valo elbranĉiĝis
disde Jokuldal. Tiu valo ŝajnis al Hrafnkel pli
taŭga por priloĝo ol aliaj valoj, kiujn li
jam vidis. Reveninte hejmen li petis de sia patro tiun
parton de liaj posedaĵoj, pri kiuj li rajtis,
anoncante sian decidon ekloĝi sendepende. Post
konsento de la patro li konstruis por si grandan biendomon,
kiun li nomis Adalbol, Ĉefbieno.
Hallfred konstruis por si domon.
Tie mortis en la vintro sklavino de fremda nacieco,
nomita Arntrud; laŭ ŝi la loko poste havas
la nomon Arntrudarstadir, Bieno de Arntrud. Sed en
la printempo Hallfred translokis siajn posedaĵojn
norden trans la montaron kaj faris por si novan domon
sur loko, kiu nomiĝas Geitdal. Li sonĝis
iun nokton, ke aperis al li homo, dirante:
Ĉi tie vi kuŝas, Hallfred, kaj vere malprudente.
Transloku vian loĝejon for de tie ĉi, okcidenten
trans la riveregon Lagarfljot. Nur tie vin atendas
la feliĉo.
Post tio li vekiĝis kaj prenis siajn posedaĵojn
kun si trans la riveron Ranga, en la distrikton Tunga,
al loko, kiu poste portas la nomon Hallfredarstadir.
Tie li loĝis ĝis sia maljuna aĝo. Sed
translokiĝante li forgesis kunpreni unu paron
de kaproj. Kaj en la sama tago terglitaĵo falegis
sur la domon, kaj pereis tie tiuj bonaj bestoj. Ĉiam
poste tiu loko portas la nomon Geitdal, Valo de Kaproj.
Hrafnkel edziĝis al Oddbjorg, filino de Skjaldulf
de Laxardal. Ili havis du filojn, unu, la malpli juna,
laŭ nomo Toris, la dua laŭ nomo Asbjorn.
Kiam Hrafnkel estis firme ekloĝinta en Adalbol,
li entreprenis grandajn oferojn al la dioj. Li konstruigis
grandan templon. La dio Frey estis de Hrafnkel la plej
amata. Al tiu li je duono dediĉis ĉiujn siajn
plej valorajn posedaĵojn.
Hrafnkel posedis bonegan beston, kiun li preferis al
ĉiuj aliaj. Tio estis virĉevalo, grize bruna
je koloro kun nigra strio laŭlonge de la spino.
Tiun ĉevalon li nomis Freyfaxi kaj ĝin donis
je duono al Frey, sia amiko. Tiomege li amis tiun ĉevalon,
ke li ĵuris solene, ke li mortigu tiun homon,
kiu rajdos sur ĝi sen li apermeso.
Hrafnkel okupis la tutan valon kaj porciigis al aliuloj
la teron, insistante esti ilia superulo, kaj sin faris
pastro-ĉefo super ili, pro kio estis plilongigita
lia nomo, kaj estis li nomita la Pastro de Frey. Li
estis aroganta, sed eminente kapabla homo. Li devigis
sub sian potencon la bienulojn de Jokuldal. Al siaj
proksimuloj Hrafnkel estis milda kaj afabla, sed kruda
kaj severa kontraŭ la homojn de Jokuldal, kiuj
devis kutime suferi pro lia maljusteco. Hrafnkel partoprenis
multajn duelojn, kaj elspezis al neniu kompenson, kiaj
ajn estis liaj misfaroj.
Fljotsdalsheid estas malfacile transirebla, marĉabunda
kaj ŝtonoplena regiono, sed malgraŭ tio Hrafnkel
kaj lia patro kutimis rajdi vizite unu al la alia,
ĉar ili tre bonrilatis. Hallfred trovis peniga
la kutiman vojon kaj tial serĉis alian vojon supre
de la rokaltaĵoj, kiuj estas alte sur la vastejo.
Tie li trovis pli sekan vojon, sed malpli mallongan,
kiu estas konata sub la nomo Hallfredargata, La Vojo
de Hallfred. Uzas tiun vojon nur tiuj, kiuj konas plej
bone la regionon.
Franko Luin / 27 februaro 1997
Siv Sjögren / 11 novembro 2004